John 11

Lasarus Ni Kurum

1Betani kona ila Lasarus ni, wu ti murum wu ei, kui rurum. Wote, kona ila amp Mariya kᵾn, ᵾngᵾn amp Mata kᵾn pek morunggil. 2Amp Mariya ni, Jisas nga kᵾmp ila kopung mura rui mat, oi ndupa kandpa, wote elim nga peng ndi kᵾⱡ ndi, kil ngurum amp ni nga kimin ni, kui rurum. 3Amp ni raⱡ ndi, Jisas kᵾn rung mundkᵾⱡ nᵾkᵾⱡ mel, “Nuim ye! Nim nga wu mᵾn mondpᵾn ni, kui rom,” nᵾtᵾnggil. 4Wote, Jisas ndi, ik ni pilpa nimba mel, “Lasarus kui rom uⱡ ei, wamp kormin ei nga kui ti rui narᵾm. Uⱡ ei, Got nga ronduⱡ ei, etpa mot ndangga, Got mbi ou tᵾmba ei nga em. Wote, Got kangᵾm ei, uⱡ ila ku, mbi ou tᵾmba,” nitim.

5Jisas ndi, amp Mata kᵾn, ᵾngᵾn kᵾn, Lasarus kᵾn numan minal ngurum. 6Jisas ndi, Lasarus kui rurum ik ei pilpa, wote murum kona ila moⱡnga, rumbᵾⱡ raⱡ omba purum. 7Wote, elim nga kitip kᵾni wu ni kᵾⱡ, kundpa nimba mel, “Juriya kona ila kelip int pamin!” nitim. 8Ni kᵾn, kitip kᵾni wu ni kᵾⱡ ndi, punt rok nᵾk mel, “Ik mbo wu ye! Jura wamp mbᵾ ndi, nim ku ndi ruimin nᵾng ni, wote nim kona ila noi pamin nin ye?” nᵾtᵾng. 9Jisas ndi, punt ropa nimba mel, “Rumbᵾⱡ tenda ila ant mong 12 petᵾm. Ei nga, wamp nam ti, rᵾnggilmᵾ nombuⱡa andrᵾm ei, kᵾmp nduma rui narᵾrᵾm. Ei nambuⱡ emel, wamp ei mᵾi kona ei nga rᵾⱡang ei, kandpa andrᵾm. 10Wote, wamp nam ti, rumbᵾⱡ ila nombuⱡa andrᵾm ni, kᵾmp nduma rorum. Ei nambuⱡ emel, wamp ei nga rukᵾr orunga rᵾⱡang ti mon,” nitim. 11Jisas ndi, i nimba kᵾn, wote nimba mel, “Tᵾn nga wu mᵾn Lasarus ni, ur petᵾm. Wote na ndi, mbo rop rut nduimp punt,” nitim. 12Ni kᵾn, kitip kᵾni wu ni kᵾⱡ ndi, punt rok nᵾk mel, “Wu Nuim ye! Wu ei, ur pem ndam, wote rut nimba,” nᵾtᵾng. 13Lasarus kurum ni, Jisas ndi, wei ur petᵾm nitim. Ni kᵾn, kitip kᵾni wu ni kᵾⱡ ndi, mbo kun ur pelinga, ninim nᵾk pᵾtᵾng. 14Wote, nimba mot ndupa nimba mel, “Lasarus ni koⱡum. Ei nga, na enim nga pilip kᵾn, pi napᵾⱡᵾmba, wu ei koⱡum. Uⱡ ei, na numan enim. Nambuⱡ emel, enim mondᵾk piling ei nga, akup pamin,” nitim. 16Tomas, wu pᵾklᵾm nᵾtᵾng ni ndi kundpa nimba mel, “Tᵾn nga wu ei koⱡum ei mel, tᵾn kᵾⱡᵾmᵾn pamin,” nitim.

17Ni kᵾn, Jisas mba kᵾndrᵾm ni, Lasarus kurum on etᵾng ni, rumbᵾⱡ tᵾmbᵾkak omba purum. 18Betani kona ei, ruⱡ mel puk, Jerusalem ekit purmin mel itim. 19Jura wamp mam ti ok, Mata kᵾn Mariya raⱡ nga kimin kurum ni nga kont kulk, koⱡa manga rᵾp rok muⱡing orung.

20Molk pᵾtᵾng mel, Jisas onum nᵾtᵾng. Mata ndi pilpa, mba nombuⱡa ila kandᵾp timp nimba puⱡnga, Mariya ni mang kona murum. 21Mata ndi, Jisas kundpa, nimba mel, “Nuim ye! Nim ya moⱡina ndam, na nga kimin wu ei kuⱡi naⱡᵾnga. 22Wote akup na pᵾnt ei, nim ndi, Got kᵾn mel ti mawa etkᵾn nin ndam, nin mel ei ngumba,” nitim. 23Jisas ndi, kundpa nimba mel, “Kemina rut kitip kᵾni wu mbᵾ nimba, oⱡa moⱡmba,” nitim. 24Mata ndi, int ndupa, nimba mel, “Ui pora nim ei kᵾn, rut nimba oⱡa moⱡmba ei, na pᵾnt,” nitim. 25Jisas ndi, Mata kundpa nimba mel, “Rut nimba oⱡa mul uⱡ ei kᵾn, wote kont mba mul uⱡ raⱡ nga puⱡ ei, na kᵾn petᵾm. Wamp nam ti, na mondpa pilim ei, koⱡum ndam kep, na kᵾn kont moⱡpa mint mba. 26Wote, wamp nam ti, kont moⱡpa, na mondpa pilim ndam, kuⱡi naⱡᵾmba. Ik ei, nim mondkᵾn pᵾn ei?” nitim. 27Ni kᵾn, Mata ndi, punt ropa nimba mel, “Kupa, Nuim ye! Nim Got nga kangᵾm ei, ya mᵾi kona ila omba, nimbun nokᵾndᵾrmᵾn wu mendpᵾⱡ ei, ik nᵾn ei, kupa mondᵾp pᵾnt,” nitim.

Jisas Ni, Ka Itim

28Wote Mata ndi, int mba ᵾngᵾn amp Mariya ni, wi ropa ol tepa, kundpa nimba mel, “Ik mbo wu ni, omba moⱡpa, nim kᵾnimp nimba, waldpa morum,” nitim. 29Ik ni, Mariya pilpa tᵾkrᵾpa oⱡa moⱡpa, Jisas murum nila purum. 30Jisas ni, mang kona ila ui nᵾwᵾrᵾm. Mata kandpa titim kona nila murum mint. 31Ni kᵾn, Jura wamp mat, Mariya kᵾn koⱡa manga rᵾp rok morung nimbᵾ ndi, kandrung ei, amp ni oⱡa moⱡpa, tᵾkrᵾpa pena purum ila kandᵾk, akil tek purung. Wamp nimbᵾ ndi, wamp on kona ila, ka etmba punum nᵾk pᵾtᵾng.

32Wote Mariya ndi, Jisas murum kona nila mba, Jisas kandpa tᵾpa kᵾn, kᵾmp puⱡ ila kopᵾtᵾm. Ropa mondpa, nimba mel, “Nuim ye! Nim ya ila moⱡina ndam, na nga kimin wu ei, kuⱡi naⱡᵾnga,” nitim. 33Ni kᵾn, Mariya ka elinga, Jura wamp rᵾp rok orung nimbᵾ, ka ku elingina, Jisas kandpa, kont kurum. 34Jisas ndi wamp nimbᵾ kundpa nimba mel “Wu ei kona nant ila angᵾndᵾng?” nitim. Wamp nimbᵾ ndi, punt rok nᵾk mel, “Wu Nuim ye! Ya okᵾn kᵾni!” nᵾtᵾng. 35Ni kᵾn, Jisas ka itim. 36Uⱡ itim ni, Jura wamp nimbᵾ, kandᵾk nᵾk mel, “Wu ni, numan minal ngorum ei, kanmin mon!” nᵾtᵾng. 37Wote, wamp mat ndi, nᵾk mel, “Wu mong titim

ti, etpa piral ndurum ni ka! Ei mel ku, wote akup, Lasarus koⱡum ei, unt oⱡnga ndam, etpa ti natilinga ei?” nᵾtᵾng.

Jisas Ndi, Lasarus Ropa Rut Ndurum

38Aldpa, Jisas nga mundmong ni, mi elinga, wu on etᵾng kona ila purum. Ku manga ila, on etᵾng ei nga keta puⱡ puⱡ ila ku ti ndi, ⱡᵾrᵾk nduk pendᵾtᵾng. 39Ni kᵾn, Jisas ndi, nimba mel, “Ku ei tᵾk mundᵾi!” nitim. Wote, amp Mata ndi, punt ropa nimba mel, “Nuim ye! Wu on ei, on kona ila telinga, rumbᵾⱡ tᵾmbᵾkak omba pum. Ei nga, elkᵾⱡ kit ti, romba ei ka!” nitim. 40Aldpa Jisas ndi, nimba mel, “Nim mondkᵾn pili, Got nga uⱡ rᵾpndi mat etmba, kᵾnin nit ni ka!” nitim. 41Wote, ku ni tᵾk munduⱡngina, Jisas tᵾpa oⱡa ndupa, kandpa nimba mel, “Wuta, na nga rᵾk rᵾk ik kum tetᵾn ei nga, nim kᵾn angge nᵾnt. 42Na nga ik ei, nim rᵾk rᵾk kum tetᵾn ei na pᵾt. Wote, akup na nᵾnt ei, ya wamp mbᵾ ndi kandᵾk, nim ndi, na tᵾk mundrun nᵾk, pilik mondᵾk pileing nᵾmp nᵾnt,” nitim. 43Ik nimba pora ndupa, ronduⱡ wi ropa nimba mel, “Lasarus nim ekit wu!” nitim. 44Wu kurum angᵾndᵾtᵾng ni, muⱡ ndi, kᵾmp ki na, kuimp keta kum rorung nimbᵾ, pᵾi oⱡa moⱡpa, ekit urum. Jisas ndi, nimba mel, “Kan pilinga nduk, mundangina omba pangga!” nitim.

Jisas Ni Ruing Pilik Nᵾtᵾng

45Jura wamp puⱡi amp Mariya kᵾning pilik, orung nimbᵾ ndi, Jisas uⱡ itim ni kandᵾk, wote mondᵾk pᵾtᵾng. 46Wote, wamp mat ndi, int puk Jisas itim uⱡ nimbᵾ, Perisi wu nimbᵾ kundᵾk nᵾtᵾng. 47Ni kᵾn, Perisi wu na, Pris wu kuimbal ni kᵾⱡ puk, kaunsil kᵾⱡ kᵾn mou rok nᵾk mel, “Wu ei ndi, uⱡ ronduⱡ mat enim ei ka! Tᵾn ndi, namba uⱡ ti itmin nda? 48Wote, tᵾn ndi, wu ei, wak ropᵾn mundmin ndam, wamp mbᵾ pora, wu ei mondᵾk pilik, pep rangina, Rom el wu mbᵾ ndi, rᵾk ok, tᵾn nga manga wingti ei, etᵾk kit mondᵾk, tᵾn Jura wamp mbᵾ, rok wapra pinding,” nᵾtᵾng. 49Ui ei kᵾn, Kaiyapas ni, wu ti, Pris kuimbal murum ei ndi, nimba mel, “Enim uⱡ mbᵾ nga ti, pilik kun iti natᵾtmin ei ka! 50Wamp kump kᵾm kuⱡing ei mon. Wu tenda ti, wamp mbᵾ nga nindpa kuⱡangga,” nitim. 51Ik nitim ni, elim nga numan ila ni nᵾndᵾtᵾm mon. Ui ei kᵾn, elim wu pris kuimbal murum ei nga pai nomba, Jisas ni, Jura wamp mbᵾ nga kan endpa, koⱡmba ei nga nitim. 52Ik nitim ei, Jura wamp kᵾⱡ nga mendpᵾⱡ mon. Got nga wamp kona elpa elpa mbila mormin mbᵾ, kᵾmp kᵾm tᵾpa, tenda etmba ei nga nitim. 53Ui ni kᵾn, Jura wu nuim nimbᵾ ndi, Jisas ruimin nᵾk mᵾi rorung. 54Ei kᵾn, Jisas ndi, Jura wamp mbᵾ nga kuimp keta ila, mot nga ᵾndi nandpa, kelpa kona kui waka tila, kona peng ti mbi tek ‘Epraim,’ nᵾtmin ila, elim nga kitip kᵾni wu kᵾⱡ kᵾn, rᵾp ropa murum.

55Ui ni kᵾn, Jura wamp mbᵾ nga Pasopa rᵾng mormin ui ou ei, nondpa elinga, kona elpa elpa nimbila, wamp puⱡi en enim nga uⱡ ⱡawa mbᵾ, wak ropᵾn, Got nga kuimp keta ila kai muⱡmin nᵾk, Jerusalem kona ila purung. 56Ni kᵾn, Jura wamp nimbᵾ, manga wingti ou nila molk, en enim waldᵾk nᵾk, int yant etᵾk, nᵾk mel, “Akup nga ui ou ila, Jisas omba muna mon nda, nᵾk ko tᵾk morung,” nᵾtᵾng. 57Wote Perisi na, wote Pris wu kuimbal nimbᵾ ndi, ik ti, nᵾk mel, “Wamp nam ti ndi, Jisas kona nant tila moⱡangga, kanᵾng ndam, tᵾkrᵾk mint en enmin ok, kundᵾk nangina, wu ei tᵾp imp muⱡmin,” nᵾtᵾng.